காண்டீபம்- சித்திரை 2017 இதழ் உள்ளடக்கம்

-ஆசிரியர் குழு

தூணி- 1; அம்பு-3

சித்திரை, வைகாசி, ஆனி- 2017 இதழ்

***

உள்ளடக்கம்

 

 

Posted in சித்திரை-2017 | Tagged | Leave a comment

3.7 எது நமது புத்தாண்டு?

-எஸ்.ராமச்சந்திரன்

புத்தாண்டு சிறப்புக் கட்டுரை- அட்டைப்படக் கட்டுரை

திராவிட முன்னேற்றக் கழகத்தின் செயல் தலைவர் திரு.மு.க.ஸ்டாலின், தாங்கள் மீண்டும் ஆட்சிக்கு வந்தால் தை மாதமே தமிழ்ப் புத்தாண்டு என்று சட்டம் இயற்றுவோம் என்று அண்மையில் பேசியுள்ளார். அவர்கள் ஆட்சிக்கு வருவது, சட்டம் இயற்றுவதெல்லாம் இருக்கட்டும்; தமிழ் மரபு எது என்று முதலில் தெளிவாகத் தெரிந்து கொள்ளட்டும் என்பதற்காகவே இக் கட்டுரை எழுதப்படுகிறது.

திண்ணை.காம் இணைய இதழில் 17.04.2006 அன்று  ‘சித்திரையில்தான் புத்தாண்டு’ என்று ஒரு கட்டுரை எழுதியிருந்தேன். தி.மு.க அரசு (2006-2011) தை மாதமே தமிழ்ப்புத்தாண்டு எனச் சட்டமன்றத்தில் சட்டமியற்றியபோது இக் கட்டுரையின் சுருக்கப்பட்ட வடிவம்  ‘தினமணி’ நாளிதழில் வெளிவந்தது. அதன்பிறகு, ஓகை நடராஜன் போன்ற நண்பர்களுடனான கலந்துரையாடலின் விளைவாகப் பல புதிய கேள்விகள் முன்வைக்கப்பட்டு, அவற்றுக்கான விடைகளும் கண்டறியப்பட்டன. அந்த அடிப்படையிலேயே இக்கட்டுரை எழுதப்படுகிறது.

முதலில் ஆண்டு என்ற சொல்லை எடுத்துக் கொள்வோம். சம்ஸ்க்ருதத்தில் வழங்குகிற வருஷம் என்ற சொல் மழைக்காலத்தைக் குறிக்கிற வர்ஷருதுவைத் தொடக்கமாகக் கொண்ட காலக் கணிதத்தை அடிப்படையாகக் கொண்டு சூட்டப்பட்ட பெயர். அதாவது கடுங்கோடை முடிந்து மழைக்காலம் தொடங்குகிற ஆவணி மாதத்தில்தான் ‘வர்ஷம்” பிறக்கும். வருடம் என்று தமிழில் இச்சொல் வழங்கினாலும், மழைக்காலத் தொடக்கத்தை வருடப் பிறப்பாகக் கொள்வதில்லை. சம்ஸ்க்ருதத்தில்  ‘சம்வத்ஸரம்’  என்ற சொல்லே ஆண்டு என்ற பொருளில் பரவலாகப் பயன்படுத்தப்படுகிறது. ஆயினும், இவ்வாறு ஆவணி மாதத்தை ஆண்டுப் பிறப்பாகக் கருதுகிற ஒரு மரபு இருந்துள்ளது என்பதற்கு தொல்காப்பிய உரையாசிரியர் நச்சினார்க்கினியர் சான்றளிக்கிறார். Continue reading

Posted in சித்திரை-2017 | Tagged | Leave a comment

3.1 அன்பிற்கினிய வாசகர்களுக்கு

 

அன்பிற்கினிய வாசகர்களுக்கு,

நமஸ்காரம்.

அனைவருக்கும் இனிய தமிழ்ப் புத்தாண்டு வாழ்த்துக்கள். எங்கும் எதிலும் மங்கலம் நிறைந்திருக்க இறையருள் துணை புரியட்டும்.

பாரம்பரியம் என்பது ஜல்லிக்கட்டில் மட்டுமல்ல, நமது வாழ்க்கையில் பலவிதங்களில் ஊடும் பாவும் போல பின்னிக் கொண்டிருக்கக் கூடிய ஒன்று. பண்டிகைகள், திருவிழாக்களும் மிகப் பழமையான பாரம்பரியம் என்பதோடு மட்டுமல்லாமல்,  மக்களனைவரையும் ஒரே புள்ளியில் இணைக்கக் கூடிய பேராற்றல் வாய்ந்தவை. இதுநாள் வரையிலும் நமது பாரத தேசத்தில் மக்களிடையே ஒற்றுமையை கட்டிக் காத்து வருவதும் இது போன்ற பாரம்பரியம் கொண்ட நிகழ்வுகளே.

பாரம்பரியமும் கலாசாரமும் பாதிப்புற்றால் ஒரு தேசம் தன் உயிர்சக்தியை இழந்துவிடும். இது தெரிந்தே தேசவிரோத சக்திகள் நம்மிடையே ஊடுருவியுள்ள மேற்கத்திய சிந்தனையைக் கொண்டு நமது கண்களை நம் கைகளைக் கொண்டே குத்தும் வகையில் பாரம்பரிய செயல்பாடுகளில் தலையிட்டு அவற்றைத் தகர்க்கும் வகையில் செயல்பட்டுக் கொண்டிருக்கின்றன. ஜல்லிக்கட்டுக்கு ஏற்பட்ட எழுச்சி,  மற்ற பாரம்பரியங்களையும் கட்டிக் காப்பதில் தொடர வேண்டும் என்பதே நமது விருப்பம். Continue reading

Posted in சித்திரை-2017 | Tagged | Leave a comment

3.2 இறைவனை வழிபடு

 

கவிஞர் குழலேந்தி

 

ஆதி சங்கரர்

இறைவனை வழிபடு, இறைவனை வழிபடு,
இறைவனை வழிபடு அறிவிலியே!
மறைபல மனனம் செய்வதனாலுன்
மாரகம் தவிர்ந்து போய்விடுமா?

பொருள் மிக விரும்பும் மூடா, மூடா!
பொதியெனும் ஆசை அகற்றிவிடு!
தருமமுரைக்கும் கடமையினைச் செய்
தடைந்திடும் பொருளில் மகிழ்வுறுக!

மங்கையர் தனமும் நாபியும் கண்டு
மதியினை இழந்து பதறாதே!
அங்கம் முழுதும் மாமிச வடிவம்
என்பதை மனதில் எண்ணிடுக! Continue reading

Posted in சித்திரை-2017 | Tagged , | Leave a comment

3.3 குமரப்பாவின் தனிமனிதன்

-மருத்துவர் சுனீல்கிருஷ்ணன்

125-ஆம் ஆண்டு காணும் காந்தியப் பொருளாதார அறிஞர்

ஜோசப் கர்னேலியஸ் குமரப்பா அவர்கள் குறித்த சிறப்புக் கட்டுரை.

ஜே.சி. குமரப்பா

ஜே.சி.குமரப்பா

(1892, ஜனவரி 4- 1960, ஜனவரி 30)

எமது அமைதிக்கான தத்துவமும் அணுகுமுறையும் மாறுபட்டன. நாங்கள் தனிமனிதனைச் சீர்திருத்துவதன் மூலம் சமுதாயத்தை சீர்படுத்துதல் என்ற கருத்தை நம்புகிறோம். தனி மனிதன் மனதில் எழும் வன்முறை வெறியை அடக்கிவிட்டால் போருக்கான வாய்ப்புகள் இல்லாமல் போகும். தனிநபர் வெறுப்பு, பகையின் முதிர்ச்சியே போர், ஆயுதக் குறைப்பு மூலமாகப் போரை நிறுத்திவிட முடியாது. மனிதர்களின் தேவையை செயற்கையாக வளர்த்து, அதை மையபடுத்தபட்ட பெரிய உற்பத்தி முறைகளால் ஈடு செய்யப் பார்க்கிறோம். இதனால் பேராசையும், பொறாமையும் பகையும் தான் வளர்கின்றன. இதுவே தேசங்கள் இடையேயான பகையாக, போராக வளர்கிறது. நிலையான சமாதானமே காந்திய முயற்சி. இது நமது பொருளாதார சிந்தனையில் மாற்றத்தை வலியுறுத்துகிறது.

– ஜே.சி. குமரப்பா, ‘சீனாவில் ஜே.சி.குமரப்பா’

(பனுவல் சோலை வெளியீட்டகம்,  தமிழாக்கம் – ஜீவா)

ஆஷிஷ் நந்தி, காந்தி- காலனியத்தின் சாதனங்களை கொண்டே அதன் முதுகெலும்பை முறித்தார் என்கிறார். நவீன காலகட்டத்து ‘தனி மனித வாதம்’ சுதந்திரத்தின் மீதும் நீதியுணர்வு மீதும் எழுப்பப்பட்டது என்றாலும், முதலாளித்துவம் மிக வசதியாக ‘பொறுப்பேற்றலை’ மழுங்கடித்து தனக்கு ஏதுவான சந்தையாக மட்டும் மாற்றியிருக்கிறது. நவீன ஐரோப்பாவில் தனி மனித வாதம் பெரும் லட்சியவாதத்தோடு உருவாகி அய்ன் ராண்டின் ‘சுய மைய’ கோட்பாடுகளில் நிலை பெறுகிறது. ராண்டின் தனி மனிதன் தனக்கானவற்றைத் தேடி அடைபவன். கொண்டாட்டமாகவும் களியாட்டமாகவும் வாழ்வைக் கருதுபவன். அந்தக் கருத்தில் அல்ல, ஆனால் அந்தக் கொண்டாட்டத்திற்கு அவன் புறப் பொருட்களைச் சார்ந்திருக்க வேண்டும் என நம்பத் துவங்கியதே நவீன மனிதனின் மிகப்பெரிய சிக்கல்.

காலனியம், முதலாளித்துவம், அடிப்படைவாதம், போர் என நவீன காலத்து மிகைகளுக்கு முறி மருந்தாக காந்தியம் உருவானது எனக் கொள்வோம் எனில், குமரப்பாவும் – காந்தியும் முதலாளித்துவ தனி மனித வாதத்திற்கான முறி மருந்து எனக் கொள்ளலாம். Continue reading

Posted in சித்திரை-2017 | Tagged | 1 Comment

3.4 தமிழ் இலக்கியங்களில் தேசியம்- 2

-ம.வே.பசுபதி

பகுதி -2    

தொல்காப்பியர்

தொல்பழந்தமிழ் நூல்களாக நமக்குக் கிடைத்திருப்பனவற்றுள் மிகப் பழமையானது தொல்காப்பியமேயாகும். அதன் காலம் பொ.மு. ஐந்தாம் நூற்றாண்டென்பர். தொல்காப்பியம் இலக்கண நூலேயாயினும், தமிழிலுள்ள அனைத்து இலக்கிய மூலக்கூறுகட்கும் மூலவிதைகள் அந்நூலிலேயே உள்ளன. அது கருதியே தமிழிலக்கிய வரலாற்றாசிரியர்கள் அனைவரும் தொல்காப்பியத்தை முதன்மைப்படுத்தியே இலக்கிய வரலாற்றாய்வு மேற்கொள்வதை மரபாகக் கொண்டுள்ளனர். அம் மரபுபற்றி, தேடலை தொல்காப்பியத்திலிருந்தே நாமும் தொடங்குவோம்.

தொல்காப்பியத்தின் பாயிரம் எனப்படும் அணிந்துரையைப் பாடியவர் தொல்காப்பியரின் ஒருசாலை மாணாக்கராகிய பனம்பாரனார் என்னும் புலவராவார். நூல் வழங்கும் எல்லையைப் பாயிரத்தில் குறிப்பிட வேண்டும். பனம்பாரனார் வேங்கடம் முதல் குமரிவரை தொல்காப்பியம் புழங்க உரியது என்கிறார். காரணம் இந்த எல்லை தமிழ் கூறும் நல்லுலகம்.”உலகம் என்பது உயர்ந்தோர் மாட்டே” என்றபடி இங்கே உலகம் என்ற சொல் பெருநிலப்பரப்பைக் குறிக்காது; கல்வி- கேள்விகளில் சிறந்த ஆன்றோரையே குறிக்கும். Continue reading

Posted in சித்திரை-2017 | Tagged | Leave a comment

3.5 மஹாபுருஷர் ஸ்ரீ ராமானுஜர்

சுவாமி ராமகிருஷ்ணானந்தர்

 

ஸ்ரீமத் ராமானுஜர் திருநட்சத்திரம்:  சித்திரை- திருவாதிரை (01.05.2017)

ராமானுஜர் ஆயிரமாவது ஆண்டு நிறைவு

வங்க நாட்டில் பகவான் ஸ்ரீராமானுஜரைப் பற்றிப் பெரும்பாலும் பலருக்குத் தெரியாது. இதற்குக் காரணம்- ஸ்ரீவைஷ்ணவ சம்பிரதாயத்தைச் சேர்ந்தவர்களாக, அந்த மகாத்மாவின் கொள்கைகளைப் பின்பற்றுபவர்கள் இங்கே வெகு சிலரே. ஆனால் தென்னிந்தியாவில் ஸ்ரீவைஷ்ணவர்களின் பெருமை மிகவும் ஓங்கியுள்ளது. ஸ்ரீராமானுஜர் எந்த தத்துவங்களை அடிப்படையாகக் கொண்டு தமது கோட்பாடுகளை நிறுவினார்? அவர் காலத்துக்கு முன்னமே இந்த நெறி பரவியிருந்ததா? அவரைப் பின்பற்றுபவர்களுக்கு ஏன் ஸ்ரீவைஷ்ணவர்கள் என்று பேர்? சங்கர பகவத்பாதரின் அத்வைத தத்துவத்திற்கும் ராமானுஜரின் தத்துவத்திற்குமிடையே ஒற்றுமைகள் உண்டா? என்ற விஷயங்களைப் பற்றி வங்கநாட்டில் வாழ்பவரும் தெரிந்துகொள்ள வேண்டியது அவசியமே.

தொண்டர்களுக்கு அரசரான இளையபெருமாளின் அவதாரம் என்று தம் சீடர்களால் கொண்டாடப் பெறுபவரும், பிரமன் முதல் துரும்பு வரை எல்லா உயிர்களுக்கும் புகலாக விளங்கும் பெருங்கருணையும் அன்பும் பொருந்திய உள்ளம் வாய்ந்தவரும், அளவற்ற அறிவாற்றல் பெற்ற சங்கர பகவத்பாதரின் அசைக்க முடியாத அத்வைதக் கொள்கைகளை மறுப்பதற்கு, வரிசை வரிசையாக மிகவும் நுட்பமான, பெரிதும் நம்பத்தகுந்த சான்றுகளை உறுதியாக நிறுவியவருமான பகவான் ஸ்ரீராமானுஜரின் வாழ்வு பற்றியும் அவருடைய போதனைகள் பற்றியும் அறியாமலிருப்பது உசிதமல்ல.

தமது தத்துவத்தைப் பின்பற்றுபவர்களிடையே அவர் இன்றும் பேராற்றல் பொருந்திய ஒரு மகாபுருஷராக விளங்குகிறார். இந்த நூற்றாண்டில் பரவியுள்ள பௌதீகவாதத்தையும் நாத்திகவாதத்தையும் எதிர்த்து நின்று, தமது வாழ்க்கை முறையில் எவ்வளவோ மாறுதல்கள் தோன்றியிருந்துங்கூட அவற்றிற்கு ஈடு கொடுத்து, ‘நமது உடலைக் காப்பதற்காக பிற உயிர்களைக் கொன்று உண்பது இழிவான பெரும்பாவம்’  என்பதை உணர்த்துகிற ஸ்ரீவைஷ்ணவர்களின் உள்ளம், தூய தாவர உணவையே உண்ணுகின்ற முனிவர்களைப் போன்ற கருணையுள்ளம் ஸ்ரீராமானுஜரின் அரிய உபதேசங்களின் பயனாகவே இன்றும் நிலைத்துள்ளது. Continue reading

Posted in சித்திரை-2017 | Tagged | Leave a comment

3.6 மறுவாழ்வு (சிறுகதை)

-சுப்ரபாரதிமணியன்

மேகம் கறுத்து இருட்டாக்கியது. நான்கு நான்காய் இரு பக்கங்களிலும் எட்டு அறைகள் இருந்தன. அந்த ’ ‘லைன் வீட்டில்’’  மேற்குப் பக்கம் குளியலறை,  கழிப்பறை போன்று ஏதோ தென்பட்டது. முத்துலட்சுமி பரபரவென்று குளியலறைப் பக்கம் எரிந்து கொண்டிருந்த குண்டு பல்பைப் பார்த்தாள். எட்டு வீட்டுக் கதவுகளும் எந்த நிலையில் உள்ளன என்று பார்க்கிற மாதிரி நின்றாள்.

“வலது பக்கம் மூணாவதா இருக்கற ரூம்ல போயி இரு” அவன் கைகாட்ட அவள் நகர்ந்தாள். அவளின் பக்கம் வெளியிலிருந்து வந்தவள் நின்றாள்.

“வாம்மா”

முத்துலட்சுமி தயங்கி கிழக்குச் சுவரின் அழுக்கைப் பார்த்தபடி நகர்ந்தவள் நின்றாள். அந்தத் தெருவின் அழுக்கையெல்லாம் கூட்டிச் சேர்த்த மாதிரி அதன் வலது பக்க மூலை இருட்டாகியிருந்தது.  Continue reading

Posted in சித்திரை-2017 | Tagged | Leave a comment

3.8 விவேகானந்த பஞ்சகம்

சுவாமி விபுலானந்தர் 

சுவாமி விவேகானந்தர்

 

வாழியநின் றிருநாமம்! வாழியவிந் நாடு

வையகமே சிறந்ததென வானகத்தோர் வழுத்த

ஆழியிறை யுலகிருந்தோ அரனுலக மிருந்தோ

அருமுனிவ  ருலகிருந்தோ அவனிமிசை யடைந்தாய்? 1

.

அடைந்ததுவும் அருட்டிறத்தின் சிறப்பையுரைப் பதற்கோ?

ஆண்மையிது வெனக்காட்டிக் கீழ்மையகற் றுதற்கோ?

முடிந்தமுடி பாகியவே தாந்தத்தின் பொருளை

மொழிந்தவித்தை தனையகற்றி முத்திநிலை தரற்கோ? 2 Continue reading

Posted in சித்திரை-2017 | Tagged , | Leave a comment

3.9 தமிழர்கள் ஹிந்துக்கள் அல்லரா?

-பத்மன்

இந்திரன்

“விதியே விதியே தமிழச்சாதியை என்செய நினைத்தாய்?” என்று மகாகவி பாரதி புலம்பிய வரிகளை இரவல் வாங்கத் தோன்றுகிறது, இன்றைய தமிழறிஞர்கள் சிலரது கூற்றுகளை செவிமடுக்கும்போது.

‘திராவிடர்களான தமிழர்களிடம் ஆரிய நாகரிகம் புகுத்தப்பட்டுவிட்டது, ஆகையால் தமிழர்கள் ஹிந்துக்கள் அல்ல’ என்று சில தமிழறிஞர்கள் முழங்குகிறார்கள். இவ்வாறு கூறுவதன் மூலம் ஹிந்து என்று பொதுவான பெயரில் வழங்கப்படும் இந்திய மதங்களின் தொகுப்புக்கு, ஆன்மிகத் தத்துவக் கரூவூலத்துக்கு தமிழர்களின் மாபெரும் பங்களிப்பை அவர்கள் மறுதலிக்கிறார்கள்.

அது ஒருபுறம் இருக்கட்டும், அந்தத் தமிழறிஞர்கள்
எவையெல்லாம் ஆரியம் என்று வகைப்படுத்துகிறார்களோ அவையெல்லாம் தமிழ்நாட்டில் போற்றுதலுக்குரியதாய், தமிழனுக்கு உரியதாய் சங்க இலக்கியங்களில் குறிப்பிடப்பட்டுள்ளனவே! Continue reading

Posted in சித்திரை-2017 | Tagged | Leave a comment